Showing posts with label decor. Show all posts
Showing posts with label decor. Show all posts

Tuesday, June 14, 2016

أجوائي الرمضانيه في منزلي الصغير ..





بسم الله الرحمن الرحيم .. السلام عليكم و رحمة الله مبارك عليكم هذا الشهر الفضيل ،، هذا الرمضان غير بالنسبه لي لأني أول مره أكون بالكويت كامل الشهر فحبيت أسوي تغييرات بسيطه للبيت تعطي أجواء و تحمسنا للقراءة و العباده ، و بما أني كنت مسافرة و رجعت قبل رمضان بكم يوم ف ما أمداني اطلع السوق بس قلت ماراح يمنعني هالشي و استخدمت اشياء عندي من قبل بتغييرات بسيطه تعطي روح للمكان و تغير علي الجو لأن رمضان بعيد عن الأهل صعب جدا مع انه شهر عباده و الواحد يلهى فيه بس قرب الأهل له طعم غييير و( الحمدلله على كل حال )
..
أول شي طاولة القهوة مهم عندي شكلها و ترتيبها لأنها بغرفة المعيشه و قدامي اغلب الوقت ، جبت صينيه قديمه عندي من سنوات كان لونها عنابي كئيب رشيتها بخاخ ذهبي و حطيت فيها فانوس ايكيا الشهير و شمعه بالبطاريه ( شكله بالظلام اجمل ) و طبعت دعاء عن رمضان و حطيته بالبراوز الذهبي مع الورده الصغيره ، و استخدمت مفرش الطاوله هاند ميد اخذته من تركيا قبل فتره و كنت محتاره وين استخدمه ، حبيته اعطاني شكل جميل للمكان ..