بسم الله الرحمن الرحيم ..
السلام عليكم و رحمة الله و بركاته .. أول تدوينه لي سواليفيه ههههههه ان شاء الله أحبها و اتحمس اسوي مواضع ثانيه طبعا بما أنها اول مرة ترددت كثير في طرحها بس بما أن هذي مساحتي الخاصه و صندوق ذكرياتي ف ماراح اتردد ب طرح أي فكرة تخطر على بالي ..
في اي تاريخ من السنه الكل منا عنده مناسبه خاصه يفرح فيها و مو شرط يفرح يمكن هذا التاريخ يذكره بانجازاته و نجاحاته و يمكن العكس و أحيانا يكون منبه يتوقف عنده الشخص حتى يشوف الاشياء الناقصه بحياته و يحاول يغطيها او تكون دافع له أنه يبدا بدايه جديده و يترك كل اللي مضى خلفه ،، بالنسبه لي انا مو من الأشخاص اللي يحتفلون بهالمناسبات لأني احسها أكبر من الاحتفالات و الكيك و الشموع حتى لو عملتها مرة من باب التغيير .. أحب في هذا الوقت أكون لوحدي تماما لأن لما تنعزل عن العالم راح تكون اصدق بتعاملك مع نفسك و هذا الشي احب اسويه بين فتره و الثانيه ، اول شي اعدد النعم اللي عندي و استشعرها حتى لو كانت بسيطه و سهله و ممكن انها موجوده عند اغلب الناس و ماصرنا نستشعرها ، لكنها نعمه واجب علينا شكرها و الله قادر انه يسلبها منا بلحظه ( ف الحمدالله على كل ما أنا فيه الأن ) و سبحان الله لاحظت ان استشعار النعم و حمدالله عليها يزيد من القناعه و الرضا و اتوقع انه أكثر شي يريح الشخص ، وكمان أحب أعيد حساباتي و أشوف الاشياء اللي عملتها و اشكر نفسي عليها و اقدرها و الاشياء اللي اتمناها حتى احاول اتقدم و امشي لها ، في مقوله احبها تقول ( ان الانسان في هذه الحياة مسيّر و ليس مخيّر ) عندي ايمان شديد فيها لكن ابداً ما يمنع أن الشخص يجتهد و يقدم و يضع له اهداف و خطط يمشي عليها لأن مجرد ما تكتب الهدف و تضعه امامك اتوماتيكي راح تشتغل عليه اذا كنت صادق مع نفسك .. حتى في علاقاتنا مع الناس المفروض نعيد حساباتنا فيها فيه ناس تضيع الوقت بدون فائده و فيه ناس سلبيه و محبطه و فيه ناس ما همها الا الكلام ؛ بالنسبه لي انا ابد مو اجتماعيه و ما احب مخالطة الناس باستمرار لكن ما يمنع ان يكون عندي التزامات و عندي ناس مفروض علي اشوفهم باستمرار سواء اقارب و اهل او اصدقاء لكن اتخذت هذا القرار اللي فادني كثييييير و ريحني أكثر ؛ أن حتى لو التزمت بأشخاص ما يروقون لي ما أخليهم يأثرون علي بأي شكل من الاشكال و اذا حسيت ب موقف يضايقني أو ما يرضيني ما أسكت عنه لأن اهم ما علي نفسي و راحتي ( أتوقع اننا بحاجه ل الأنانيه بعض الوقت او على الاقل تقدير الذات ) ، و أكيد اقدر اكون على خلق و تعاملي راقي و بنفس الوقت ما أخلي احد يأثر فيني او يضايقني بتصرف اذا جمعت بين هالشيئين و قدرت توازن بينهم راح ترتاح كثير ..
من الاشياء اللي أحب اسويها كمان إني اخذ اجازة من كل شي بالحياة لو يوم استرخي فيه و اتامل و ادلع نفسي شوي ( و لنفسك عليك حق ) و هالاشياء البسيطه اللي مفروض نسويها بين فترة و الثانيه تعطينا طاقه و تزيد من ثقتنا بأنفسنا لان لما نعطي انفسنا مساحه ناخذ حريتنا فيها و نسوي الاشياء اللي نحبها بعيد عن الضغوطات راح يرتفع معدل السعاده و الطاقه و راح نشتغل و ننجز بشكل أكثر و بعد الانجاز راح يرتفع معدل الرضا عن الذات و راح نكون واثقين من انفسنا أكثر ..
فيه عادات يوميه بسيطه ممكن تعيق انجازنا و تأخر وصولنا للهدف اللي نبيه و مع انها بسيطه الا انها احيانا تكون جزء من يومنا و التغلب عليها يكون صعب لأن لنا فتره على هذي العاده بس اكيد فيه حلول اذا عزمنا على التغيير و شلنا الاستسلام من قاموسنا بالنسبه لي أحب الليل و اعشق السهر احس الليل هو وقت الهدوء و الروقان و الجلسات الحلوه بس السهر لفترات طويله ابدا مو صحي خصوصا ان لي فتره من تخرجت من الجامعه و هذا نظامي ، ف قررت اني اغير هالنظام و جالسه احاول اعدل من نظامي اليومي خصوصا ان تعديل النوم مرتبط بأهداف ثانيه ف هالشي خلاني اتحمس اغير هالعاده و لا بأس من السهر و الاستمتاع بين فتره و اخرى بالاجازات و السفر مثلاً >> على شان اقنع نفسي اني انتظم بالنوم بدري لازم ارضي حبي للسهر من جهة ثانيه (:
و بعد من العادات اللي صارت جزء من يومي و أحاول اني اغيرها هو النظام الغذائي من يوم ما صرت انا اطبخ لنفسي تغير اكلي و ما صرت اهتم كثير ( هنا عرفت قيمة امي الله يخليها لي ) عادي اجلس جوعانه طول اليوم و اخر شي اطلب مطعم او اسوي شي بالبيت من دون قيمة غذائيه و بعد ما صرت اتعب و اراجع بالمستشفيات و اخذ مغذي و ابر ): عرفت اني جالسه اسوي خطأ كبير بحق نفسي و اني لازم ابدا بالتغيير ؛ و مستحيل راح يتغير هذا كله بيوم و ليله شوي شوي بديت ابحث و اقرا و احاول ادخل اشياء بسيطه ليومي و ما تاخذ وقت و جهد حاولت ادور طرق لطبخات مفيده و سهله و فيه اشياء اجهزها و اخليها بالفريزر على شان اذا احتجت و ما كان عندي وقت اطلعها و اسويها على السريع طبعاً ما يمنع ان بين فتره و فتره تجيني لحظات كسل و خمول و مالي خلق اسوي شي و احياناً اشتهي أكل المطاعم بس الحمدلله فرق كبير عن قبل و تحسن افتخر فيه بيني و بين نفسي هههههه الحمدلله ..
...
الشي الأخير اللي احب اقوله انه اذا عزمنا على التغيير كل شي حولنا راح يساعدنا و يوقف جنبنا و كل شي حولنا راح يتغير على حسب تغيرنا اذا كان للافضل او للاسوء قال تعالى : ( ان الله لا يغير ما بقوم حتى يغيروا ما بأنفسهم ) التغيير لازم يكون نابع من داخلنا .. ( و القادم اجمل باذ الله )
No comments:
Post a Comment