البدايه قرار ..
لماذا ننتظر تاريخ معين حتى نحاسب انفسنا و ننظر الى انجازاتنا و نخطط لاهدافنا ..
بالنسبه لي يوميا احلم و اخطط و احاسب نفسي و اذا حسيت اني بحاجة ل شيء اعمله بنفس الوقت و اخطط له و اسعى فيه
و اذا ربي كاتبه لي راح يتيسر و اذا ربي ماكتبه لي ماراح يجي ,, و لله الحمد راضيه تمام الرضا عن هذا القرار و مرتاحه جدا ..
ما فهمت اللي كل بداية سنه يكتبون اهدافهم و ايش يتمنون و نهاية السنه تشوف اذا تحققت و لالا ..
من وجهة نظري هالاسلوب جدا خاطيء بحق نفسك ( و لأن نفسي عزيزة و غاليه علي جدا ) ف ممكن هالاسلوب ينتج شخص
غير راضي عن نفسه و عن حياته و مكن يكون شخص محبط اذا هالاهداف ما تحققت ..
لأن مومعقوله كل سنه راح اكتب لستة اهداف و كلها او اغلبها راح تتحق في كل سنه حتى لو اجتهدت و اشتغلت على نفسي ،
ممكن يمر عليك 5 سنوات و لا شيء من اللي تتمنينه صار و في شهر واحد يتحقق كل شيء بارادة ربي ..
اتذكر موقف صار لي اخر سنه بالجامعه و كنت جدا سعيده لاني راح اتخرج و انتظر متى تنتهي السنه لكن اللي حصل ان بعد الاختبارات استدعوني مكتب الاشراف و قالوا لي باقي لك ماده ما درستيها ,, يعني راح ارجع ادرس الكورس الجاي .. يعني مافي تخرج !!! طبعا على طول بكيت و ناقشتهم اني متاكده اني دارسه الماده و ناجحه فيها بعد , وقتها كان ممكن يصير فيني شي لأني مخططه و حاطه التخرج من اول اهدافي لهالسنه و لأن تخرجي كان مرتبط بالسفر ف تخربطت كل اموري و اهدافي حتى صحتي تدهورت و تعبت كثييير ...
من بعد هالموقف تعلمت اني ما اربط و اعلق نفسي ب شيء معين و تعلمت اني اترك التخطيط لشيء بعيد لأنه بعلم الغيب و لأنه مو بيدي و من بعد هالقرار و انا جدا مرتاحه و متصالحه مع ذاتي و تقديري لنفسي صار اكبر بكثير من قبل .. ما أنكر اني احب الترتيب و التخطيط خصوصا الكتابه تريحني كثير و تصفي ذهني و يكون تركيزي اكبر ف احاول ارتب اموري القريبه و ادون الاشياء اللي راح اشتغل و اسعى فيها بكذا اكون قدمت اللي علي و حتى لو ما تحقق ما ازعل و لا اتضايق لأن ضميري مرتاح جدا مرتاح و لله الحمد .. لكن سالفة كل سنه ابي اقرا 20 كتاب و انحف 10 كيلو و اشتري شنطة LV و اسافر المكان الفلاني ما تمشي عندي لأني اقدر ذاتي و احترمها و اربطها دائما بالله و بالدعاء هنا راح نحصل على السعاده الحقيقه و تحقيق الامنيات ، لا سنه و لا تاريخ و لا يوم راح يجيبون اللي نتمناه ، ف لا تحصرون انفسكم ب وقت معين انطلقوا و اسعوا و ادعوا و ربي ما راح يخيب احد ..
اتمنى لكم ايام سعيده و مليئه بالمسرات و الافراح
القاكم قريبا باذن الله ..
للتواصل :
No comments:
Post a Comment