عطورات مرتبطة بالذكريات "

 

بسم الله الرحمن الرحيم ..
السلام عليكم ,, أول مشاركه لي في هذا العالم الجميل اللي اتمنى افيد و استفيد منه قدر الامكان ..

 

احترت باختيار أول موضوع و فكرت كثير لاني حابه انه يكون خفيف و ممتع ف وقع اختياري على ( العطورات ) اللي كلنا نستسلم امامها ، مين منا ما تجذبه الروائح الجميلة و يحتار قبل يختار العطر المناسب له ؛ أنا بالنسبه لي أحس العطر يعبر عن الشخص سواء شخصيته او اسلوبه او حتى مزاجه ، و مافي اجمل من أن العطر اللي تحبينه يرتبط بذكرى مميزة بمخيلتك .. أبد ما كنت مقتنعه بهالشي و أن ممكن شي بسيط مثل عطر ممكن يرجعني لأشياء قديمة ’’  نصحتني بهالحركة وحده صاحبتي وقت زواجي قالت لي استخدمي عطر واحد اول شهر و اتركيه بعدها و ارجعي استخدميه راح يرجع لك نفس الوقت و الذكريات ... سويت مثل ما قالت لي بس كنت استخدم كذا عطر و ركزت على واحد فترة اقل من شهر و تركته و الحين بعد ما كملت كم سنة زواج بس احط منه على طول زفتي تشتغل بمخي و تجيني رجفة مضحكة (: من شدة انه له تأثير كبير و انربط بمخيلتي هذي الريحه و هذيك الايام .. و اخيرا صدقت كلام صاحبتي و اقتنعت ، ف حلو اذا عندك مناسبه او حتى سفر تختارين له شي مميز يذكرك بهذي الاوقات و اكيد اختيار الروائح يختلف باختلاف الاوقات و المناسبات يعني عطر فخم و رائحته قويه اكيد  ما يناسب الصباح و العكس كذلك ما انسى ايام الجامعه لما يكون يومي كله صداع بسبب رائحة عطر قويه شميتها غصب عني ): و عموما عطورات الدوام افضل تكون خفيفه و الافضل ايضا عطر للجسم و لوشن يفي بالغرض 

اليوم اخترت ثلاث عطورات قريبه لي يمكن ما تكون جديده لكن احبها و عموما انا مو النوع اللي يلاحق ورا الجديد خصوصا العطورات احس مافي شي جديد في شي حبيتيه و راح ترجعين تشترينه كذا مره و شي ماتقدرين تاخذينه اصلا ...

* أول عطر اخترته من شانيل ( CHANCE EAU FRAICHE )  

هذا العطر من العطورات البارده جدا و بنفس الوقت مميزة و منعشه واضح فيه الليمون من اول ما جربته عموما اللي مويتها خضرا غالبا يدخل فيها الليمون و تكون فريش هذا العطر داخل فيه الياسمين و المسك الأبيض ، و من ناحية الثبات ما في احد يختلف على قوة ثبات عطورات شانيل عموما و هذا العطر من تجربتي ثباته ممتاز جدا لدرجة ان يضل باللبس مدة كم يوم و اذا حطيت منه على شعري بعد يوم لما اخذ شاور تبين ريحته مع المويه ف اتوقع ان هالشي يكفي .. 

سعره تقريبا حدود 600 رس 

*العطر الثاني من ايف سان لوران ( BELLE D'OPIUM ) 

هذا العطر رائحته شرقيه بحته  قويه و واضحه لو من رشه وحده فخم جدا واتوقع افضل وقت مناسب له السهرات و الليل و عن نفسي ماقدرت استخدمه بأوقات عاديه اقصد بدون مناسبه ، واضح فيه البخور بما أنه شرقي و يدخل فيه خشب الصندل و الجاردينيا و الياسمين ، ثباته جدا رائع حتى لو كنتي بسهرة كبيرة ما تخافين انها خفت مع الوقت بالعكس انا ارتاح اذا كنت ماخذته معي خصوصا لو كان ماعندي وقت للبخور هالأشياء .. 

سعره تقريبا 450 رس 

*العطر الثالث و الأخير من جوسي كوتور (EAU DE PARFUM) 

هذا العطر اصنفه من العطور الرسميه المميزة غير مكرر أبد يعتبر متوسط بين البارد و القوي هالشي معطيه ميزة انك تقدرين  تستخدمينه بأوقات كثيرة ، مزيج بين الفواكه و الفانيليا و المسك و الياسمين .. اكتشفت الآن ان اغلب عطوراتي يدخل بتركيبتها الياسمين شكلي احبه و انا ماادري (: 

سعره تقريبا ب 400 رس

فيه معلومه قرأتها خلال اطلاعي تناسب موضوعنا كثير اعجبتني و حبيت انقلها لكم لأنها جديده علي و هي : أن حاسة الشم أقوى من النظر"بدليل أن الطفل " عندما يولد يعتمد على حاسة الشم أولا للتعرف الى أمه و ليس على أي حاسة أخرى ... سبحان الله شي غريب تأثرت بقرائته و يدل على أن الرائحه و الاهتمام بها شي جدا مطلوب و المفروض يكون من الأولويات ..

 بكذا انتهى موضوعي الأول اتمنى أكون أفدتكم لو بالقليل و بالنسبه للاسعار حطيت التقريبي اللي اتذكره لأنه بعضها قديم و ممكن تغير سعره و بعضها اخذته و انا مسافره ف يختلف السعر عن هنا 

القادم أجمل و اكثر دقه باذن الله