منتجات للوجه من شركات مختلفه 👍💖 Products for the face from different companies

        
                                      بسم الله الرحمن الرحيم  .. 
السلام عليكم .. موضوع اليوم تابع للي قبله تقريباً بتكلم فيه عن منتجات للوجه استخدمتهم  الفترة اللي فاتت ،  و بالبدايه انا( بشرتي مختلطه ) على شان تتأكدين قبل اذا هالمنتجات راح تناسبك و لا لا ؟! ياللا نبدأ 👏

               1- اول منتج هو واقي الشمس من بايوديرما    ( 100 Bioderma spf ) 
طبعاً ما يحتاج اتكلم عن اهمية استخدامنا للواقي و ضرورته للحفاظ علي بشرة صحيه و مو شرط نكون نخرج للشمس باستمرار على شان نستخدم الواقي بالعكس المفروض من اول ما نصحى و ننظف بشرتنا نستخدمه على طول ، قبل فترة سمعت اخصائي بشرة يقول : الواقي يستخدم حتى لو كنت بالمنزل ماراح تتعرض للشمس لان السبوت لايت يضر البشرة ): و هذا المنتج جداً جميل نتفه منه تفي بالغرض و تكفي كامل الوجه بالنسبه لي اكثر واقي استخدمته و ناسبني حسيته خفيف و البشرة تتنفس و اهم نقطه بالنسبه لي بما ان بشرتي مختلطه انه ما خلا بشرتي تلمع او دهنيه مثل واقيات استخدمتهم قبل ؛ هذا المنتج spf فوتوديرم فيه منه انواع لكل بشرة و احتياجها فيه الكريم (  cream ) للبشرة الجافه و العاديه ،  و السائل ( fluid ) للبشرة الدهنيه ، و المستحلب ( Milk ) للجسم ، و كمان فيه منه التنتيد اللي يكون فيه لون و يغني عن كريم الاساس و فيه منه فاتح ( Light ) و غامق ( Dark ) ، و اللي استخدمه كريم بدون لون و درجة حمايته 100  فيه اقل من كذا بس شمسنا يفضل لها حمايه عاليه ، موجود في اغلب الصيدليات سعره بحدود 100 ر.س  لكن كميته كبيرة ..
نصيحه : عند استخدامك لأي واقي شمس احرصي على ان تضعيه قبل التعرض للشمس ب نص ساعه على الاقل لان الضرر يكون اكبر لو وضعتي الواقي و خرجتي مباشرة .

   
              2- المنتج الثاني هو كريم مرطب اسمه اورنج ديالي  ( Orange Daily  ) 
 مرطب يومي للوجه يعزز الكولاجين الطبيعي للبشرة استخدمته كثير الفتره اللي فاتت لكن مو يومي حبيته ترطيبه حلو حسيت قوامه مائي اكثر من الكريمي لما تحطينه على بشرتك يعطي شعور بارد و منعش و كمان كميته جميله فيه ناس كثير يمدحونه بانه عالج لهم بشرتهم و تحسنت معاه بس انا شخصياً ماشفت هالشي و يمكن لسببين اني ما استخدمته بشكل يومي و ان بشرتي مافي مشاكل دائمه فتره تتعب و يطلع لي حبوب و ترجع تخف بعد الاهتمام الحمدلله ؛ موجود بالصيدليات و سعره 120 ر س  . 

        

                 3- كريم العينين من نيفيا  (  Eye cream nivea visage  ) 
كريم لمكافحة التجاعيد و تفتيح المنطقه اللي تحت العين ( الهالات ) ، السواد تحت عيني مش قوي الحمدلله لكن عندي انتفاخ و يسبب لي خطوط بهالمنطقه مع الميك اب و اخترت هالكريم يرطب لي المنطقه و يفتحها على شان يخفف لي من المشكلة ؛ بصراحه هو رطب لي المنطقه يعني استخدمه قبل الميك اب و ارتحت من سالفة الخطوط ، لكن ابد ما فتح المنطقه و ماحسيت بتغيير معاه للاسف ): يمكن لأن مشكلتي الاكبر هي الانتفاخ و ليس السواد ف انا اعطيه عذر ، موجود بالصيدليات و السوبر ماركت للاسف مو متذكره سعره يمكن ب 35 رس .

انتهى بوست اليوم  تكلمت فيه عن 3 منتجات مهمه للبشرة ان شاءالله تكونون استفدتوا منها
و القادم افضل باذن الله 💋❤️