منتجات ترطيب الشفايف .. Moisturize lips products

                                                 بسم الله الرحمن الرحيم ..

تدوينة اليوم تابعه للي قبلها عن الترطيب بس اليوم راح اتكلم عن منتجين لترطيب الشفايف استخدمتهم الفترة اللي فاتت

لان كل فترة اعاني من تشقق في الشفايف و احاول ارطبهم و استخدم كثير اشياء منها الفازلين 😂 اللي كان جداً جميل
و ترطيبه جداً عالي من اول مرة يبين الفرق بس السبب اللي يخليني ما استمر عليه هو انه يسمر خصوصاً لو تعرضت للشمس ف قلت الافضل استخدم اشياء مخصصه للشفايف و كل مرة اجيب شي و راح اتكلم عن افضل منتجين استخدمتهم و حبيتهم 💖 !!

                          ١-  اول منتج مرطب للشفاه ب شمع النحل من شركة بيزلين

شركة بيزلين جداً ممتازه و علاجية و اغلب منتجاتهم خاليه من العطور و مخصصه للبشرات الحساسه و هذا اكبر سبب يخليني اجرب منتجاتهم لاني اعاني من الحساسيه و التهاب الجيوب الانفية ف ما اتحمل الروائح ابداً ف من هالسبب وقعت بحب هالشركة و خصوصاً هالاصفر الجميل ، هذا المنتج قوامه ثقيل نوعاً ما و ترطيبه قوي يعني مع استمرار ٣ ايام او بالكثير ٥ ممكن يختفي التشقق و لو استمريتي عليه بالعكس الشفايف تكون رطبه جداً و صحيه مع انه لونه اصفر لكن لما تستخدميه يكون شفاف طبعاً ؛ شكله مثل الليب ستيك او الروج ف أتوقع انه يطول على ما يخلص و سعره جداً مناسب مايتعدى ٢٠ رس و موجود بأغلب الصيدليات ..

         
                        ٢- المنتج الثاني هو مرطب الشفايف الشهير (: eos

اتوقع ان الاغلب جرب هالمنتج و معروف جداً ،  يتوفر بعدة نكهات رائحته جداً خفيفه و هاديه ترطيبه حلو يعتبر اخف من بيزلين لكن ترطيبه ممتاز اعجبني فيه قوامه و اني اقدر استخدمه للترطيب اليومي بحيث ما اتضايق منه ، و كثير استخدمته ك بيس للارواج المات ، لأن بعض الارواج معروف تنشف بعد فترة و يصير شكل الشفايف مش و لا بد حتى لو ان شفايفك صحيه و ما تشتكي من شي ، هذا اكثر شي استفدته من مرطب eos و حبيته فيه هذا غير شكله الجميل و الخارج عن المعتاد يشدك تجربينه غصب (: سعره كان بحدود ٣٥ رس متواجد في صيدليات التجميل مثل وايتس و بوتس و اغلب التاجرات يوفرونه ..


مثل ما انتو شايفين في الصورة الاولى فيه منتجات غير عن اللي تكلمت عنهم بس لاني ما استفدت منهم ماحبيت ياخذون حيز بالموضوع راح اتكلم عنهم على السريع لابيللو استخدمته كثير بس للاسف ماحسيته مفيد بالترطيب ابد فترة قصيرة و ينشف و ممكن ينشف الشفايف اكثر من قبل ، و المرطب الدائري تبع بودي شوب اتوقع انه نكهه فقط مافيه اي ترطيب مجرد يعطي لمعه مع لون خفيف ..
بكذا انتهت تدوينة اليوم ان شاء الله تكون افادتكم و القادم افضل باذن الله 💕💋