مشترياتي في السفر ,, My shopping in the travel ( Make up & Beauty and more ) 2015 ..

السلام عليكم و رحمة الله و بركاته ..  بوست اليوم مختلف شوي عن اللي قبل و هو عن مشترياتي الفترة اللي فاتت حسيت ان فيه اشياء ممكن اشارككم فيها ممكن تفيدكم او تستمتعون فيها مثل متعتي بكتابة هالبوست ..

      أول شي هو مشتريات الصيدليه مكاني المفضل لو اجلس فيه ساعات ما أمل و هالمره الصيدليه في ماليزيا و كان فيها منتجات كوريه و اندونيسيه تجذب كثير .. اللي ورا ماسك للوجه ب نكهات مختلفه ، و الكبسولات الملونه الصغيرة هذي امبولات للشعر كل لون له وظيفه معينه انا صراحه بديت باللون البنفسجي لأنه للشعر المصبوغ و راح اكمل عليها فترة و اذا نفعتني راح اتكلم عنها بالتفصيل هنا باذن الله ..

الشي الثان منتجات العنايه بالبشرة من اليمين شركة فتشي ( VICHY )  الاول واقي شمس للبشرة الدهنيه او المختلطه و اللي جنبه كمان واقي شمس لكن ملون و بعده لوشن و كريم كيو في ( QV ) و طبعا حبيب الجميع ببايو ديرما حجم ميني للسفر و كريم ( Flexitol ) معالج للمنطقه اللي حول الظافر ..

من لو كسيتان بخاخ زيت اللوز لشد البشرة مناسب للستريتش مارك و الترهل و الشي اللي ما استغني عنه منهم هو زبدة الشيا و هذي بعد تحتاج موضوع مفصل لها لحالها .. زبدة الشيا سعرها 200 ريال سعودي تقريبا و زيت اللوز سعره حدود 170 ..

                            



باث اند بودي وركس المفضل حاليا بالنسبه لي لأشياء الجسم خصوصا الصوابين و الشاور جل و الشموع و أنصحكم تستغلون وقت الخصم لأنه فرق بالسعر مره كبير و مع هذا الخيارات كثيرة حتى وقت الخصم يمكن بس الشموع اللي خياراتها محدوده نوعا ما ، الصورة الأولى صوابين اللي غطاها كبيرة رغوة و اللي غطاها صغير مقشر او سنفرة .. سعرها 15 و 20 رياال تقريبا بعد الخصم ..

                                                      و هذي أنواع للشاور جل و سعرها 30 ريال بعد الخصم ..

                                   
                      و هذي الشموع احب الاحجام الكبيره لكن للاسف اغلبهم مخلصين و سعرهم بالسعوديه ب 50
                                        و للاسف لقيتهم بالكويت اقل من 3 دنانير يمكن 25 او 30 ريال ..

 نبدا ب مشتريات الميك اب هذا الباليت الجديد نيكد من اربن ديكاي نزل منه 3 قبل و هذا آخر واحد اسمه سموكي اخذته من سيفورا ألوانه جميله و اساسيه سعره تقريبا 200 ريال سعودي و شوي بس اخذته لما كنت مسافره ف يمكن يفرق السعر ..

من اليمين ماسكرا لانكوم عليها ضجه كثير و جذبني شكلها و فرشتها من الداخل ف قلت أجربها سعرها 120 ريال سعودي اخذتها من المطار و من اليسار كونسيلر نارس المشهور بما أنه مخلص من عندنا طول الوقت ف استغليت الفرصه و اخذته لما كنت مسافرة و سعره ب 115 ريال سعودي ..

فرشاة سيفورا هي المفروض انها للبلاش بس انا افضل استخدمها للكونتور خصوصا للخد و باودر برونز من سيفورا عارفه راح احتاجه بالصيف ،، الفرشه سعرها ب 70 تقريبا و الباودر قريب منه اعتذر الاسعار مو بالضبط لأن اغلبهم اخذتهم و انا مسافره ف صعب علي احفظهم ..

فرشاة فورايفر للحواجب خصوصا لو تستخدمين منتج كريمي حبيت ان الجهه الثانيه فيها مشط يصير ثنين في واحد رقمها 274 سعرها 95 ريال .. و جل الحواجب من انستازيا ما استغني عنه مع انه مو استخدام يومي لأنه يبي له جلسه و ممكن يحوس و انا مستعجله بس مميزاته كثير قبل درجتي كانت غامقه حبيت اغير و اخذت ميديم براون سعرها 135 ريال سعودي تقريبا .. معلومه عن جل انستازيا او اي منتج كريمي اتركيه مقلوب يعني الغطا الاسود تحت هذي الطريقه تخفف من انه يجف بسرعه ..

هذي الماركه اتوقع مو موجوده عندنا اسمها جولدن روز اكتشفتها لما كنت بتركيا المره الأخيرة أكثر شي جذبني و اللي أحب  أجربه سواء غالي او رخيص هو الارواج و المحددات و المناكير باقي الميك اب ما احب اجازف فيه خصوصا كريمات الوجه و منتجات العيون ،، و الصراحه هذي الماركة نتيجتها جدا جميله و ثباتها عالي و اللون نفسه لما تحطينه حبيتها كثير مقارنه بسعرها و الصراحه ما اتذكر السعر بالضبط لكن كانت رخيصه جدا و راح تلاقونها ب اسطنبول في كل مكان لهم محل صغير مثل محل فلورمار ..

و المنتج الأخير مجموعة من نينا ريتشي عطر كبير و ميني للشنطه و كريم اسمه ليكستاز ( L’EXTASE ) رائحة الورد و الزهور واضحه عليه اعتبره متوسط بين الخيف و القوي .. و هذا خصوصا معاي عذر لو ماعرفت سعره لأنه جاني هديه و اعرف انه مو مشترياتي لكن حبيته و قلت اشارككم فيه ..

انتهى بوست اليوم يمكن يكون شوي طويل بس سريع لأن اغلبه صور بدون قرقره كثيره (: ان شاءالله يكون افادكم لو بالقليل و حبيتوه بالنسبه لي هالنوع من البوستات متعب نوعا ما لكن ممتع ، اتمنى اشوف تفاعلكم .. القاكم قريبا باذن الله
يسعدني تواصلكم على الانستقرام أو تويتر او سناب شات  @Liberty_Blogger

                                                     ............................................